產後5週：寶寶老衝住妳笑？因為佢鍾意見到妳開心！

寶寶

隨住寶寶踏入兩個月大，佢已經唔再容易受驚跳動，或者四肢動作唔穩定，佢而家唔單止習慣咗外界聲音，仲可以分辨聲音來源。依家寶寶已經可以靠自己抬頭，妳或者仲會覺得寶寶成日衝住妳笑，雖然佢唔會笑出聲，但佢真係知道妳喺笑所以感到開心㗎；除此之外，妳仲會驚訝於佢嘅「童言童語」，嗰啲咿咿呀呀嘅聲音，竟然真係代表住佢嘅需求同情緒！建議媽咪可以抓住佢清醒嘅時候不停同佢互動、講嘢，呢樣會有助佢嘅語言發展，情緒都會較為穩定。

媽咪

近幾週嘅混亂生活可能為妳帶嚟啲憂鬱情緒，唔好排斥俾親友或者醫生幫妳排解，除此之外妳都要記住，呢啲育兒生活唔會係妳一輩子，呢段時間嘅努力好快就會有回報，當孩子達到一個又一個成長里程碑時，妳會覺得好開心，仲會加倍疼愛佢。如果妳已經開始恢復規律運動，妳可能會迎來無止盡嘅腰痠背痛，因為妳啱啱經歷咗一段好長嘅催殘期呀！唔好氣餒，都唔好一下子過度增加運動強度以免拉傷；職業媽咪最近可能要重返職場，妳會覺得有啲緊張，因為又要面對全新嘅生活體驗，唔妨盡快計劃好之後嘅作息，提早開始按表操課。