產後24週：冇骨鬆但仲係腰痠？試下骨盆矯正啦！

寶寶

而家寶寶嘅情緒會受父母有冇喺身邊影響，如果父母唔喺身邊佢就會顯得煩躁；另外，佢而家已經可以自己喺床上滾動玩樂，有時會利用手臂同膝頭推拉嘅原理短距離移動，雖然唔係真係爬，但可能快咗好多。寶寶會慢慢發出更多聲音，加上情緒、語調變化多，仲學識模仿父母表情，育嬰生活變得更加好玩啦！建議父母要經常同啞啞學語嘅寶寶對話，刺激佢嘅語言能力喔！

媽咪

產後17週嘅文章提過腰痠可能係骨質疏鬆引起，之後你有冇去檢查呢？好多媽咪檢查結果都好ok，只要盡快加強鈣質補充就得，但腰痠問題仲係未解決。其實唔止媽咪，現代人大部分都有姿勢唔正造成骨盆歪斜嘅問題，只係媽咪因為孕期要靠特定姿勢舒緩身體負擔，或者產後成日翹腳餵奶導致骨盆唔正，再加上每個女生都會有嘅外擴問題，咁腰痠只會越嚟越嚴重，到後來甚至會由下往上歪連脊椎都側彎，身體點可能舒服？如果媽咪有呢個問題，可以考慮搵物理治療或者做骨盆瑜伽，女人骨盆好易變形，光係盤腿十分鐘就會外擴，所以千祈唔好小睇自己嘅一舉一動，趁早矯正絕對嚟得切！