產後2週：身體好痛又好肥，好彩仲有療癒嘅寶寶可以睇！

寶寶

新生兒而家正努力適應新環境，因為相比起子宮嗰個較暗又安靜嘅世界，外面世界真係好唔同；雖然上一週寶寶嘅體重降低咗啲，但隨住食量增加，寶寶呢一週應該又返到出世時嘅體重喇。孕期文章入面有提過寶寶喺肚入面發展嘅反射動作，嗰啲反射動作喺寶寶出世後會一一顯現，例如妳會發現周圍環境出現較大聲音時，寶寶嘅四肢會下意識咁收返去胸口位；如果妳發現寶寶呼吸時有啲唔順暢嘅咻咻聲，可能係因為毯、衫上嘅棉絮跑咗入寶寶嘅呼吸道，呢個冇問題，只要用小棉花棒沾啲嬰兒油，固定好寶寶頭部之後輕輕咁幫佢清乾淨就得。呢週嘅寶寶依然係瞓覺時間佔大多數，父母可以趁呢個時間多抱抱寶寶，或者趁佢醒住逗佢笑，即早建立良好關係。

媽咪

產後已經過咗一週，妳嘅子宮應該仲會因收縮而痛，尤其係餵奶嗰陣，自然產嘅會陰傷口亦都仲會痛；乳房脹奶、漏奶、充血都係正常現象，如果有餵奶嘅媽咪呢陣可能會覺得乳頭成日摩擦到乾又痛，市面上孕婦專用嘅羊脂膏通常都可以食用，唔使驚寶寶萬一食咗會有害；妳可能仲會肌肉痠痛。雖然生完BB後妳已經少咗5-7公斤體重，但身上剩返嘅肉如果想甩掉都仲需要啲時間，如果呢陣有朋友見到妳，佢哋可能仲會覺得妳睇落有啲似孕婦。