孕期第19週：成就感爆棚，度過種種風波終於到了孕中期！

寶寶

本週頭臀長約13–15公分，體重為200公克，攞返你學生時代用嘅短尺出嚟，嗰就係寶寶捲起身子嘅長度喇。講個令人驚奇嘅事實──寶寶喺21週之後出生時嘅大小，將會係而家嘅15倍，好神奇吖係咪！而家透過超音波可以睇到胎兒嘅胸口上下起伏，呢個係胎兒正在呼吸嘅表現，只不過而家吸入去嘅係羊水，而唔係空氣。胎兒會透過媽咪嘅骨骼聽到聲音，所以當媽咪講嘢令骨骼震動嘅時候，胎兒就會知道；另外，根據研究顯示，相較於高頻聲音，胎兒比較偏好低頻聲音，所以爸爸如果可以多啲同胎兒傾偈，胎兒會好開心㗎！

媽咪

恭喜媽咪終於捱到孕中期啦！直到而家為止，你已經克服咗充滿不適嘅孕初期、流產嘅可能性，同埋胎兒最唔穩定嘅變動期。而家嘅你可能已經可以挺住個肚周圍行、想食乜就食乜，甚至仲可以感覺到寶寶嘅胎動，諗到都覺得媽咪一定成就感爆棚啦！由本週開始，媽咪應該要養成數胎動嘅習慣，可以將呢個行程安排喺每日晚飯後嘅8–9點，一個鐘頭平均胎動應該有3–5次，如果連續幾日都有異常，就請同醫生聯絡；如果都冇問題，都唔好停止持續關注，因為你嘅高度關注對胎兒嚟講係一種好好嘅情感交流。隨住子宮變大，腹部嘅圓韌帶亦都會持續伸展嚟支撐佢，呢個有時會引發你下腹疼痛，尤其係你突然轉換身體姿勢嘅時候會更加劇烈，真係好唔舒服嘅話，記低落嚟同醫生講。