孕期第9週：少女腰消失，體虛貧血令我覺得自己似林黛玉…

寶寶

本週胎兒頭臀長大約2.2-3厘米，差唔多係一節手指指節咁長。胎兒呢週有好大嘅進步，不單止手腳長咗唔少，指尖嘅觸墊亦慢慢長出嚟，如果可以睇到子宮內部，就會發現寶寶嘅雙手幾乎可以互相碰到！而家胎兒嘅眼皮已經慢慢可以覆蓋眼睛，等發育完成之後就可以閉眼；外耳部分已經發育完成；最開心係胎兒已經會扭動身體，透過超聲波可以睇到一個細細嘅寶寶喺子宮內活動嘅可愛模樣。

媽咪

本週胎兒已經塞滿骨盆腔，慢慢向肚上方移，所以媽咪會發現自己腰圍明顯粗咗一圈。懷孕期間母體血液總量會增加大約50%，咁先可以滿足你同寶寶嘅需要，除咗輸送養分，身體亦係為咗生產時失血作準備，所以媽咪會覺得最近好容易貧血，而貧血又會令身體更加疲倦，所以媽咪會覺得自己好似病咗咁。好多電視節目同網絡文章為咗收視率同點擊率會將懷孕講得好恐怖，但大部分孕婦其實唔會遇到嗰啲令人焦慮嘅情況，所以各位媽咪應該避免對號入座，如果睇咗會恐慌或者焦慮，就盡量唔好去睇，因為嗰啲都係唔會發生喺你身上嘅「最糟情況」。