孕期第8週：我一樣每日保養，點解皮膚越嚟越差？

寶寶

本週胎兒頭臀長大約1.4~2厘米，差唔多係一粒花豆咁大。胎兒嘅鼻樑已經成形，透過超聲波好明顯睇到，除此之外眼部嘅皺摺亦慢慢出現，不知道媽咪你鍾意單眼皮定雙眼皮呢？除咗眼皮同鼻樑，胎兒嘅內耳、外耳同心肺都開始發育，如果用肉眼睇到胎兒，喉嚨位置延伸到肺部嘅管狀物好似樹木分支咁，而胎兒嘅手亦長咗啲，由心臟附近延伸出嚟大約2厘米長，手指腳趾已經睇得出嚟。

媽咪

媽咪呢週開始應該會慢慢感覺到自己腰部開始豐腴，原本貼身嘅衫而家都略顯緊繃，如果呢週做骨盆檢查會發現子宮已經變大。撇開外在變化，媽咪會感覺自己腹部有時會有啲緊繃甚至絞痛，呢啲都係正常感覺，如果好擔心可以請醫生檢查一下；另外，有部分孕婦反映孕期會有偏頭痛，多數原因係壓力同疲勞引起嘅緊張性頭痛，媽咪可以試下減少週邊噪音同強光，少食花生、朱古力、乳酪、肉類等食物，如果仲係好唔舒服，可以請醫生評估後開孕婦可用止痛藥，千祈唔好忍住唔理。最後講返媽咪最關心嘅問題之一：皮膚。懷孕期間媽咪荷爾蒙會變化，呢啲變化會令皮膚變差，可能變乾燥或者長痘痘，好多人會諗：「咁我就同以前一樣食A酸、擦水楊酸精華液」，呢個萬萬唔可以！A酸會導致胎兒畸形或者流產，水楊酸嘅影響則未明；如果想舒緩，可以多飲水，或者請醫生開藥都得。