孕期第5週：「乜？我懷孕咗！」，新手媽咪學習始業式

寶寶

寶寶而家大細得1.25毫米，連一粒BB彈都比佢大！雖然胎兒仲好細，但佢呢週已經開始發展軀幹骨架喇，中樞神經、肌肉、骨骼等等，會由呢週開始慢慢成形，而且胎兒嘅眼睛都仲喺發育中，呢週嘅進度係腦袋兩邊長咗兩個溝，你冇睇錯，胎兒呢時嘅眼睛就好似魚咁長喺頭兩側。跟住，呢兩個溝會變成口袋狀，形成視泡。

媽咪

呢週你可能啱啱先發現自己懷孕，雖然身形未變，但你可能已經開始害喜，如果你本身就容易暈車或者有偏頭痛，咁你好大機會會係害喜媽咪。講到害喜，有啲媽咪可能淨係覺得噁心，但好多媽咪會伴隨嘔吐，雖然好唔舒服，但研究指出害喜越嚴重嘅人越唔容易流產，所以媽咪嘔嘅時候至少都有開心嘅理由。害喜症狀雖然係整日性，但大部分孕婦會覺得朝早同瞓覺前特別唔舒服，最簡單嘅舒緩方法係補充維生素B6，同埋注意飲水，不飲水比唔食更致命。

除咗害喜，現階段仲會出現嘅症狀有頻尿、疲倦、乳房變化，頻尿會持續而且愈嚟愈嚴重；疲倦亦係非常正常，如果要返工嘅媽咪可以補充孕婦專用維生素，盡量避免糖類同咖啡因；懷孕期間乳暈會變黑、有刺痛感，乳腺周圍會隆起，呢啲都係好明顯嘅變化。注意：孕媽咪嘅健康同心情最緊要，能食能訓就係王道，唔好顧慮太多先係正確。