孕期第34週：懷咗個藍眼寶寶？胎位唔正就睇呢週！

寶寶

本週頭臀長約32公分，身長45公分，體重大約2150公克左右。胎兒而家應該已經為分娩做好準備，不單止轉咗做頭下臀上，頭部亦已下降到骨盆；呢個時候醫生會開始特別留意胎位，如果胎位唔正，就會開始糾正，畀媽咪啲矯正胎位嘅小運動返屋企做作業。不過呢部分又分初產婦同經產婦，經產婦嘅胎兒可能會較遲入盆，甚至有啲胎兒等到分娩前先入盆。因為虹膜嘅染色過程未完成，所以胎兒而家嘅眼睛仍然係藍色，等出世後接觸光線幾週先會發育完成。

媽咪

雖然有時會提到每週應該增加嘅體重，但媽咪千祈唔好因為呢個而俾自己壓力，每個人體質唔同，只要妳嘅體重有適度增加就得，即使量度出嚟同其他人唔同都冇問題。屋企有寵物嘅媽咪，如果未幫佢哋做好迎接寶寶嘅心理準備，可以而家就開始。妳可以先帶佢去認識其他小朋友；布置好屬於佢、細路唔可以入嘅專屬區域；慢慢減少陪佢嘅時間，等佢習慣孩子出世後可能要同細路分享媽媽嘅生活；改變寵物餵食同玩嘅時間。如果屋企嘅寵物係鳥或者鼠類，一定要處理好清潔，因為鳥類排泄物毒性好高，可能有細菌寄生；鼠類可能帶有沙門氏桿菌，所以一定要關喺籠入面，避開寶寶。