孕期第27週：寶貝大眼轉不停，媽咪半夜被揍得訓唔著！

寶寶

呢星期頂臀長24公分，體重大約900公克，好快胎兒就會衝破一公斤大關！胎兒嘅聽覺同視覺神經都已經發展得更加敏銳，所以建議媽咪可以繼續讀故事書俾佢聽，呢個會令你同胎兒都覺得平靜；胎兒嘅眼皮而家已經可以自由開合，雖然佢仲喺媽咪肚入面，但係透過超音波可以見到胎兒嘅眼睛動來動去。

媽咪

隨住胎兒越嚟越強壯活潑，你可能會發現胎兒而家嘅胎動越嚟越強而有力，有時甚至會覺得有啲痛，半夜仲被搞到訓唔著，正面諗，呢個代表你嘅胎兒非常健康。不過呢，胎兒安靜時唔代表有問題，如果擔心，媽咪可以喺飯後進行計算胎動，可以用一個鐘頭動咗幾多次，或者動10次需要幾耐作為計算標準。由於而家已經進入孕後期，建議媽咪可以開始參加媽媽教室，雖然孕期仲剩大約三個月，但提早啲上完媽媽教室會比臨盆時仲一知半解要好。媽媽教室主要係教媽咪分娩有咩方法、生產過程可能會發生啲咩事、去到醫院要做啲咩等等，參加媽媽教室唔單止可以學到呢啲重要嘅嘢，你仲會發現其實好多媽媽都有同你一樣嘅疑問，你嘅心情亦會因此安定啲。