孕期第24週：寶寶鍾意搖滾樂？媽咪請保持心情愉悅！

寶寶

頂臀長21公分，體重約540公克，成長速度依然好快。胎兒嘅心跳聲愈嚟愈大，如果其他人將耳仔貼喺你嘅肚皮上，好有可能可以直接聽到心跳聲㗎！胎兒而家嘅聽力已經愈嚟愈敏銳，除咗每日聽到媽媽嘅心跳、肺臟呼吸聲，有時候外界出現吸塵機、音響、電鑽等發出嘅聲音，胎兒都會顯得躁動；有人發現，如果播放節奏較重嘅音樂，胎動幅度會變大，但如果播放古典抒情音樂，胎兒就會好快安靜落嚟，或者你呢個星期都可以試驗下睇吓喎！不過父母們都唔好過度，令胎兒長時間暴露喺高分貝場所會直接傷害胎兒聽力，偶爾去一次演唱會仲可以，但如果係需要長時間提高音量講嘢嘅場所就要盡量避免。

媽咪

孕期即將進入第七個月，唔知媽咪你嘅心情係咪好緊張呢？好多媽咪會喺孕期出現抑鬱症，如果你最近有出現無故感到過度悲傷、作息突然改變（早起、瞓唔着）、缺乏專注力、想傷害自己等症狀，請媽咪一定要有需要求助嘅自覺，唔好令自己陷喺而家嘅抑鬱情緒入面，咁樣唔單止對自己冇好處，亦都會傷害到胎兒。研究調查顯示，有抑鬱症嘅產婦所生嘅孩子體型通常偏細，或者較容易早產，而且產婦本身亦容易因為冇心力好好照顧自己而患上糖尿病；有啲人嘅抑鬱症係家族遺傳，不論係乜嘢原因，你都應該向專業人士或者可靠嘅人求助，唔單止係為咗胎兒，更加係為咗你自己嘅人生。