孕期第12週：寶寶學識張口要奶奶，媽咪陷入妊娠紋恐慌！

寶寶

本週寶寶頭臀長6厘米，體重大約8–14克。胎兒雖然早已經有心跳，但因為太微弱，所以檢查時都聽唔到，一直到呢週，胎兒嘅心跳先至強壯到可以透過超聲波聽到；而家胎兒嘅手指同腳趾已經分開，神經系統亦已發育，全身皮膚好敏感，如果呢時刺激佢，佢可能會動動手指或者瞇眼張口！除咗敏感嘅皮膚，寶寶呢週仲開始出現一個新嘅反射動作，即係出世後最重要嘅反射─尋乳反射，只要碰到胎兒嘅面，佢就會張開口去搵食物來源。未來媽咪哺乳時就會發現，寶寶一接觸到媽咪胸部肌膚，就會張口準備吸奶，係咪好可愛？

媽咪

呢個時候就開始飄出孕味啦。懷孕滿三個月後，媽咪會開始覺得臃腫唔少，不單止肚子慢慢隆起，罩杯都會增加，而且仲會有輕微脹痛感，建議媽咪可以著啲寬鬆啲嘅衫令自己舒服啲。呢個月媽咪可以開始準備兩樣嘢—妊娠霜同哺乳內衣；孕婦皮膚急速撐大會令膠原蛋白斷裂，容易生妊娠紋，如果想預防，可以從而家開始保養增加肌膚彈性，控制體重增加唔好太快，同時唔好忽略保養品嘅成分同飲食營養嘅均衡。哺乳內衣可以令罩杯增加嘅媽咪穿得更舒適，比起運動內衣，哺乳內衣嘅材質同剪裁都唔同。除咗妊娠紋，媽咪仲會發現某啲部位皮膚乾癢或者有色素沉澱，乾癢可以靠抹乳液舒緩，而色素沉澱通常產後會自然消退。