孕期第11週：下腹硬硬，寶寶係你？

寶寶

本週頭臀長大約4.4–6厘米，體重約8克，大小大概同一粒檸檬咁。呢週開始胎兒下巴會由胸口抬起，脖子亦會變長，另外手指甲已經可以喺超聲波入面睇到；生殖器方面逐漸發育成形，預計三週內就可以分辨性別。好多爸媽睇到超聲波時會興奮話：「好似你/你啊！」，然後就畀人白眼：「長成咁最好都似人啦…」，但其實，從呢時候開始似父母真係有可能嘅！因為胎兒呢時已經開始發展肌肉，以面部肌肉嚟講，分佈位置同協調性都同遺傳有關，所以表情亦會從呢時開始同父母似。

媽咪

雖然胎兒仲好細，但子宮呢時其實已經大到充滿妳成個骨盆，如果妳而家用手摸下腹同恥骨中間，妳會發現竟然可以摸到硬硬嘅子宮！係咪覺得自己同寶寶有咗接觸呢？孕期會因荷爾蒙變化或新陳代謝加快，有啲媽咪會開心話自己頭髮長得快又多，但亦有啲媽咪會喊住抱怨落髮嚴重、指甲成日斷，如果係咁，建議媽咪可以買頂鍾意嘅帽子配服裝，等孕期完咗，呢啲暫時性嘅變化就會消失。呢週開始，部分媽咪應該會感覺胃口增加，噁心症狀大幅減輕，如果未有呢啲變化都唔緊要，最多等到第19週之後就會好好多啦。